Estructura de datos

Una estructura de datos ye una mena d'organizar l'atroxu de datos na memoria d'un ordenador, pa que esos datos puedan emplegase eficientemente.

Qué ye o non "eficiente" depende de pa qué se vayan a emplegar. Dalgunes vegaes, al escoyer l'algoritmu que vaya a trabayar colos datos ya ta claro qué estructura de datos hai qu' usar; otres ye al revés, y al escoyer les estructures queden determinaos los algoritmos. En xeneral lo que se quier ye que l' algoritmu necesite el menos tiempu posible pa facer la so xera, o bien que los datos ocupen el menos sitiu posible na memoria del ordenador. Lo meyor sería siempres que se dieren les dos coses: gastar cuanta menos memoria meyor, y cuanto menos tiempu meyor. Pero de cutio nun se pue facer un algoritmu óptimu pa les dos coses al tiempu; si se gasta menos memoria, tardará más, y viceversa. Por eso, al facer un programa ye perimportante escoyer y diseñar les estructures de datos que va usar. Esa decisión pue facer, por exemplu, que'l mesmu programa tarde (pa facer una xera determinada) segundos o díes, namái con camudar les sos estructures de datos.

Nun principiu, los protagonistas de los programas yeren los algoritmos, el fluxu d'execución. Pero bien ceo salieron llinguaxes de programación nos que los protagonistes yeren les estructures de datos, y qu' ufiertaben una sintaxis afayadiza pa describiles y manexales. Primero foron llinguaxes modulares, y dempués llinguaxes empobinaos a oxetos, comu C++ o Java.

Hai munches estructures de datos, con carauterístiques estremaes. Nes lliniales los datos formen una secuencia; son exemplos les llistes, piles o coles. Nes estructures non lliniales cada datu pue tener más de un predecesor o socesor; eso pasa nos árboles o nos grafos. Un de los autores más conocíos na estaya de les estructures de datos y los algoritmos ye Niklaus Wirth, premiu A. M. Turing en 1984.